Ahaztutakoak, lehen planora

Emakume langileak dira osasun krisiak gehien kolpatu dituenak, Tolosaldeko Asanblada Feministaren arabera. Egoerak hala ekarrita, orain arte ezkutuan egon diren hainbat lanbide agerian geratzea ekarri du; hala nola, «bizitza sostengatzen dutenak».

Etxeko atea irekitzeak eta hura zeharkatzeak arriskuan jar dezake pertsona, koronabirusa dela eta. Ehunka dira, ordea, egunero-egunero lantokietara joan behar izaten dutenak. Lantokietan ere gauza bera. Batzuk segurtasun neurriak hartuta, besteak batere gabe. Eta zein sektoretan lan egiten duen kontuan hartuta, baldintza bat edo bestea izango du langileak. Badira osasun larrialdia ezarriagatik berdin-berdin lanean jarraitu dutenak, baina beste hainbati baldintzak aldatu zaizkie, lana gehitu zaie, edo gutxitu. Izan da lanik izan ez duenik ere.

Tolosaldeko Asanblada Feministako kideek argi diote emakumeak direla krisiak gehien kolpatu dituenak, «gaur egungo sistemak ez duelako pertsonen zaintza bermatzen». Indarkeria matxista jasaten ari diren emakumeez gain, lanera doazen emakumeak ere multzo horretan kokatu dituzte.

Koronabirusaren kudeaketaren krisiak «bizitza sostengatzen duten kolektiboak» agerian utzi dituela diote Ibarrako Deabruak Kalera Asanblada Feministako kideek. Hor kokatzen dira osasun langileak, zaintzaileak edota zahar egoitzetako langileak. Baina «arreta gutxiago» jartzen zaien beste hainbat lanbide ere azalera atera direla uste dute: besteak beste, supermerkatuetako langileak, baserritarrak, banatzaileak, etxez etxeko laguntzan diharduten langileak edota etxeko langileak. Emakumeak guztiak. «Lanbide horiek orain arte erabat ikusezinak izan dira, eta orain, begira zeinen argi ari garen ikusten zein beharrezkoak diren gizarte eta jendarte honek funtzionatu dezan, eta, batez ere, pertsonon beharrak ase ditzagun», diote asanbladako kideek. Bestalde, emakumeak gehiengoa diren komertzio txikiak ere itxita egon dira, hala nola, arropa saltzaileak, mertzerietako langileak, zapata saltzaileak, ile apaintzaileak edota estetizistak. Langile horiek guztiak etxean egon dira gaurdaino, haien negozioak itxita. Bitartean, irabazirik jaso ez eta hileroko gastu finkoak ordaintzen jarraitu behar izan dute. Hori horrela, asanbladako kideek pertsonak eta bizitzak erdigunean jartzetik hasi nahi dute gainerakoa eraikitzen. 

Tolosaldeko Asanblada  Feminista: «Bizitzen ari garen egoera honetan, euren funtsezko lanari merezi duen balioa ematea nahi dugu»

Orain arte ezkutuan izan diren langile horientzat «lan eta bizi baldintza duinak» aldarrikatu nahi dituzte asanbladatik: «Bizitzen ari garen egoera latz honetan euren funtsezko lanari merezi duen balioa ematea nahi dugu».

Guztientzat, baina bereziki osasun langileentzat dira arratsaldero-arratsaldero 20:00etako kanpaiak jo orduko balkoietan egiten diren txalo zaparradak. Arriskuko lehen lerroan kokatzen dira ospitaleetan lan egiten duten langile horiek. Tolosaldeko Ataria-k ahalegina egin du eskualdeko hainbat osasun langileren hitzak jasotzeko, baina, gehiago arrazoitu gabe, Osakidetzako goi karguetatik ez diete baimenik eman komunikabideen aurrean hitz egiteko.

Tolosaldeko Asanblada Feministatik momentu hau baliatzeko deia egin nahi dute «bestelako jendarte eredu bat hausnartzen eta antolatzen hasteko». Aldarrikatu nahi dute «kapitalaren interesak ez, baino pertsonen beharrak kontuan izango dituzten politikak premiazkoak direla». Eta gehitu dute «botere harremanak errotik aldatu eta ardurak kolektibizatzea» eskatzen dutela.

Erlazionatuak

«Hau bukatzean, berriz ere, azkenengoak izango gara»

Lizartza

Aitziber Abasolo lizartzarra saltzailea da eta koronabirusak eragindako krisiak nola eragin dion kontatu dio Ataria-ri.
«Ez dakigu errentagarria izango den»

Ikaztegieta

Larraitz Alonso ikaztegietarra ile-apaintzailea da eta koronabirusak eragindako krisiak nola eragin dion kontatu dio Ataria-ri.
«Hemengoa jan nahi du jendeak»

Baliarrain

Edurne Jauregi baliarraindarra nekazaria da eta koronabirusak eragindako krisiak nola eragin dion kontatu dio Ataria-ri.
«Lana galtzeko beldurragatik amore ematen dut batzuetan»

Tolosa

Sei urte daramatza Tolosan bizitzen Mariak -asmatutako izena da, ez du benetakoa eman nahi izan-. Urte gehienak barneko etxeko langile moduan pasa ...

Albiste hau ATARIKIDEei esker argitaratu dezakegu. Haiei esker Tolosaldeko albisteak libre, euskaraz eta kalitatez irakurtzen dituzu. Horrela izaten jarraitzeko eman babesa Tolosaldeko Atariari eta ZU ERE IZAN ZAITEZ ATARIKIDE.

#EgitenDuzunaGara


EGIN ATARIKIDE!