Zubimusu Ikastolak hartu du lekukoa

Argazkia: Zarauzko Hitza

Zarautzen ari dira ospatzen, gaur, Kilometroak jaia. Aurtengoarekin, gainera, ziklo bati amaiera emango diote, eta datorren urtean, egitura berri bati ekingo dio Gipuzkoako ikastolen aldeko ospakizunak. 2020an, Amasa-Villabona eta Zizurkilen ospatuko da, eta goizean, Zubimusu ikastolako ordezkariek jaso dute lekukoa, Salbatore Mitxelena ikastolako kideen eskutik.

Zarauzko Salbatore Mitxelena Ikastolako Aitor Amilibia langilea gitarrarekin, eta Nahikari Gabilondo gurasoa poesia errezitatuz. Horrela hasi da lekuko aldaketaren ekitaldia, jendez betetako aretoan. Euskal Herrian errotutako hezkuntza-proiektu euskalduna aldarrikatu du, izan ere: "Onar dezagun behingoz ez dugula zertan lotsatu; ez dugula zertan azalpenik eman eta barkamenik eskatu. Onar dezagun, harro, Euskal Herri osoa eta gure nortasuna aldarrikatzen dituen euskal hezkuntza-eredu bakarra garela".

Jalgi dantza taldeko zazpi dantzari atera dira ondoren oholtzara, zazpi lurraldeak irudikatu eta aldarrikatzera. Eskutik helduta ekarri dituzte Zarauzko Salbatore Mitxelena Ikastolako haurrak lekukoarekin, eta horiek Villabona-Amasa eta Zizurkilgo haurrei pasa diete egurrezko testigua. Txalo zaparradaz egin da lekuko aldaketa. Zubimusu Ikastolako lehendakariak, Mikel Ugartek, hartu du hitza ondoren. Bertso bat osatuz aldarrikatu du ikastolen beharra, eta dei egin du euskara eta euskal kultura zabaltzera.

Ikusi hemen lekuko aldaketaren ekitaldiko bideoa (Egilea: Zarauzko Hitza-Erlo Telebista)

Albiste hau ATARIKIDEei esker argitaratu dezakegu. Haiei esker Tolosaldeko albisteak libre, euskaraz eta kalitatez irakurtzen dituzu. Horrela izaten jarraitzeko eman babesa Tolosaldeko Atariari eta ZU ERE IZAN ZAITEZ ATARIKIDE.

BATAK BESTEA DAKAR


EGIN ATARIKIDE!