Gazteen aurkako epaiketa

Mikel Ayestaranek eta Aritz Lopezek beren kontrako akusazioak ukatu dituzte

Asier Imaz 2013ko urr. 15a, 13:19
Gazte auzipetuak, gaur goizean, epaiketaren bigarren saioa hasi aurretik. BERRIA
40 gazteren aurkako 26/11 sumarioan, epaiketaren bigarren saioa egiten ari dira gaur. Aritz Lopez tolosarrak eta Mikel Ayestaran billabonatarrak deklaratu dute. Atzo, auzipetuetako lau ez ziren epaiketara agertu, tartean Irati Mujika amezketarra.

Mikel Ayestaranek bere kontrako akusazioak ukatu ditu, eta Amasa-Villabonako Gazte Asanbladan parte hartzen zuela azaldu du. "Gazte Asanbladak deialdi ireki bidez funtzionatzen zuen herria bizirik mantentzeko: hitzaldi, kontzertu, txapelketa...", esan du Ayestaranek. Fiskalak froga moduan mendi martxa bateko argazkia erakutsi dio, eta Santio jaietako txoznetako txanden zerrenda eta hainbat fakturen inguruan aritu zaio.
Bere anaia zen Remi Ayestaranen omenaldi ekitaldi bateko argazkia erakutsi diote. "Ertzaintzarekin liskarra izan ondoren hil zen Remi, nere anaia", azaldu du Mikel Ayestaranek. Etxea miatu zutenean, Poliziak Remiren eta bere arrebaren gauzak eraman zituztela salatu du Ayestaranek. Manex Castroren argazki bat atzeman zion poliziak. Txikitako lagunak direla, eta lagun talde berekoak, azaldu du.
Mikel Ayestaranek Tolosaldeko Atariarekin hitz egin du, deklarazioaren ondoren, eta fiskaltzak dituen "froga eskasak" auzitan jarri dituztela esan du, "inondik inora ez direlako ilegalizatutako gauzak". Ayestaranek gaineratu duenez, "mugitzen den gazte oro terrorista da beraientzat", eta Auzitegi Nazionala "torturapean lortutako deklarazioetan" oinarritzen dela salatu du.

Mikel Ayestarani elkarrizketa Espainiako Auzitegi Nazionaletik

 

Bere aldetik, Aritz Lopezek deklarazioan akusazioarekin ez dagoela ados esan du, eta Auzitegi Nazionala "jarduera politikoagatik" epaitzen ari dela salatu du.

Ez diogu hau kapritxo hutsagatik: lagun gaitzazu . Eduki hau guztia doan ikus dezakezu euskarazko hitzik gabeko Tolosaldea ez dugulako irudikatzen. Atarikide, iragarle eta erakunde askoren laguntzarik gabe ez litzateke posible hori. Gero eta komunitate handiagoa sortu, orduan eta sendoagoa izango da Ataria: zurekin, zuekin. Ez utzi biharko gaur egin dezakezun hori: egin zaitez Atarikide!


EGIN ATARIKIDE!