Marea bat saltoka

Esnatu eta leihoa ireki dut, hainbeste denboran zain egon garen egunean zein eguraldi egiten duen ikusteko. Izugarria, eguraldi ederra! Azkar batean jantzi, ile apaindegira joan eta hortik zuzenean elkartera. Bertan hasi gara argazkiak gora eta txistor pintxoak behera. Guztia prest dagoela hor joan gara udaletxe atarira, Joakin omendu eta udaletxeko balkoira hurbildu gara. Urtetik urtera jende gehiago, anbiente nabariagoa eta alaitasun handiagoa. Jendearen urduritasunak goitik nabari dira eta txupinazoa bota ostean izugarria da denen artean lortzen den unea. Marea bat saltoka, inauteriei hasiera ematen diena. Kalera jaitsi eta txarangarekin batera urteroko ibilbidea egin ostean bazkari on baten bila joan gara elkartera. Handik zezenetara, hango giroa alaitu eta bagoaz berriro kalez kale saltoka abestuz. Eguna ezin hobe amaitzeko lagun arteko afari eta parranda eder bat dira gakoa! Inauteriei hasiera ezin hobea ematen diegu beti, eta aurtengoa ez da gutxiago izan!!