Parte hartu duten beste hiru bikoteak ondorengoak izan dira: Maialen Oroz urkizuarra eta Nagore Iraola zizurkildarra, Enara Donabera eta Jone Izagirre urnietarrak, eta Maddi Etxeberria asteasuarra eta Idoia Urdangarin billabonatarra. 15 urte azpiko trikitilariek parte hartu dute Berrobiko festen barruan egin den txapelketan, eta hiru pieza jo behar izan dituzte: trikitixa, porrusalda eta fandangoa. Kristina Solano eta Kristina Peña aritu dira epaile lanetan. Aurtengo Goiazko festetan egin den I. Trikitilari Txapelketan eta Zizurkilgo herriguneko (goiko) festen barruko txapelketan ere garaile izan ziren Urkola eta Sarabia.
Berrobiko txapelketa hasi aurretik, San Agustin eguneko mezaren ondoren agurra dantzatu dute elizaren aurrean herriko dantzariek. Gaur bukatuko dira festak herrian, baina oraindik hainbat ekitaldi falta dira ospatzeko.
