Bihartik igandera bitarte artzaintzaren alor ezberdinak ezagutzeko aukera izango da Berastegin. Izan ere, Be! Artzain kultur asteburua antolatu dute Berastegiko Udalak eta herriko Artzain-mahaiak, zenbait herritarrekin batera. Andoni Zuriarrain alkateak jakinarazi duenez, «eguraldi iragarpena dela eta, zenbait aldaketa egin dituzte iganderako programatutako ibilbidean zehar, gune guztiak babesean mantenduz».
Honela, 10:00etatik aurrera emango diote hasiera igandeari. Frontoian, ardien gunea, herriko musikariak eta photocall-a eta azoka gastronomikoa izango dira. Udaletxeko ganbaran, berriz, artzainen lan tresnen erakusketa, haurren txokoa eta gazta dastatzeko aukera izango da. Asto itzuliak plazan egingo dituzte, Astotrek enpresaren laguntzaz. Euskal artzain txakurraren erakustaldia, berriz, bertan behera geratu da. Biharko eta larunbateko ekitaldiak berdin mantenduko dira.
Igandeko ibilbidean gunerik ez egon arren, nahi duen orok ibilbidea egiteko aukera izango duela esan du alkateak. Era berean, jakinarazi du asteburu guztian zehar eskolako aldagelak eta dutxak zabalik izango direla, «dutxa bat hartu edo aldatu nahi duten bisitariei horretarako aukera eskainiz».