%2019.46.41.png)
Kamioiak sartu eta ordu batzuetara, 12:00etan, Donostian, greba komitekoak bilera bat egitekoak ziren enpresako abokatuek hala eskatuta. ELA eta LAB sindikatuetako ordezkariek, Mikel Zabaletak eta Laida Zubillagak, esan bezala, bilera honen helburua «posizioak hurbiltzea» zen, baina, atzo gertatutako ikusi ostean «zalantzan» jartzen zuten enpresak benetan egoerari irtenbidea aurkitu nahi ote dion ere. Eta euren susmorik ilunenak egia bilakatzen ari zirela ohartu dira.
Negoziazioak bertan behera utzi ostean, langileen helburu bakarra produkzioa enpresatik ez ateratzea zen. Esan bezala, enpresatik materiala ateratzeak, euren greba eskubidea urratuko lukeelako. Euren esanetan, legez kanpokoa baita langileak greban daudela, beste norbait enpresan beraien lana betetzen aritzea. Honegatik guztiagatik, sindikatuetako ordezkariek, Donostian, Lan Delegazioan salaketa jarri dute, eta eguerdirako esku artean zuten langileek materiala kargatzea «ilegala» zela zioen ebazpena.
Enpresaren kanpoaldean, berriz, presentzia poliziala nabaria zen, eta zenbait unetan, tentsio uneak ere sumatzen ziren. Ertzaintzak langileei bidea ez oztopatzeko aukera zutela gogorarazi arren, langileek argi dute ez zutela produkzioa enpresatik ateratzen utziko, eta enpresaren aurrean eseri dira guztiak, «lanpostuen eta eguneroko ogiaren alde».
Langileen salaketa
Produkzioa Unipapel-Adveo enpresatik atera ostean ere, ELA eta LAB sindikatuek gaurkoan langileen eskubideak urratuak izan zirela berrestu dute. Euren greba eskubidea eta Lan Delegazioak produkzioa kargatu eta eramatea legez kanpokoa zela zioen ebazpena alboratu direlarik. Guzti honez gain, Ertzaintzak bertan protestan zeuden pertsonekin izandako jarrera ere salatu nahi izan dute sindikatuetako ordezkariek.
Protestarekin amaitu aurretik, «eskerrak» eman dizkiete babesa ematera bertaratu diren herritar guztiei erakutsitako elkartasunagatik. Eta hemendik aurrera ere, greba hasi zutenetik egiten duten moduan, hiru errelebotako txandak egiten jarraituko dutela jakinarazi dute. Protestan jarraituko dutela argi dute.
Greban urtarrilaren 20tik
Unipapeleko langileak 2014. urtea berri txarrekin hasi zuten. Unipapel-Adveok negozioa enpresa suitzar bati saldu ziola jakinarazi zien langileei. Springwater izeneko enpresak, ordea, ez zuen Adunako lantegia oso-osorik erosi; ekoizpena baizik, eta lantegia bera Unipapel-Adveoren esku geratu zen. Horrela, bederatzi urterako hitzarmena sinatu zuten suitzarrek eta Adveoko zuzendariek, batzuek ekoitzitakoa besteek banatzeko konpromisoa hartuz.
Horrela, bada, urtarrilaren 10ean Unipapel-Adveoko zuzendaritzak Springwater suitzarrekin izandako bilera baten ondoren, ekoizpena Logroñora lekualdatzeko asmoaren berri izan zuten langileek. Horrek, epe laburrean enpresa desagertzea eragingo lukeelarik.
Honegatik guztiagatik, urtarrilaren 20an greba mugagabea hastea erabaki zuten Unipapel-Adveoko langileek. Eta zuzendaritzari hiru eskaera nagusi bideratu zizkieten: leku-aldatzeen mehatxua desagertzea, bi hilabetetan zehar negoziatzea eta akordio batera iritsiz gero, bederatzi urtean enpresak bestelako mehatxurik ez gauzatzea.
Ordutik hiru errelebotako txandak antolatuta enpresaren aurrean mantendu dira langileak. Eta helburua barrura inor ez sartzea zen arren, atzo enpresak bertako produkzioa ateratzea erabaki zuen. Honek langileekin zuten negoziazio bidea erabat haustea suposatu arren. Eta bereziki, langileei protestekin eta hogeita lau ordutako txandekin jarraitzea eragin die. Hemendik aurrera gertatuko denaren zain.
