2019an Zizurkilgo zortzi gaztek Gazteak eta hizkuntza gutxituak Erasmus+eko proiektuan parte hartu zuten Elgoibar, Donibane Garazi eta Irlandako Galway hiriko beste 24 gazterekin batera.
Iazko urriaren 28tik azaroaren 4ra bitartean, Irlandan egon ziren gaelikoaren errealitatea gertutik ezagutzen. Ondoren, abenduaren 2tik 8ra bitartean, 32 gazte horiek berriro elkartu ziren Euskal Herrian, bigarren egonaldi bat egiteko eta euskararen errealitatea erakusteko gazte irlandarrei. Bide batez, bigarren egonaldi horrek balio izan zuen gure hizkuntzaren egoeraz gogoeta eginarazteko.
Proiektuan parte hartu zuten gazte zizurkildarrek bideo bat grabatu dute, egonaldietan bizitakoa laburki azaltzeko eta Euskaraldia hastear dagoela aprobetxatuz, herritarrak ariketa honetan parte hartzera gonbidatzeko.