Festarik festa, atsedenik hartzeko denborarik gabe ibili dira asteburuan San Pedro jaiak ospatzen zituzten herrietan. Ostegunean hasi eta atzo erretirodunen egunarekin amaitu zituzten jaiak Asteasun. Leaburun eta Urkizun ostiralean hasi eta igandera arte luzatu ziren. Larraitzen, berriz, San Pedro eguna bera ospatu zuten.
Asteasun ostiralean umeak izan ziren protagonista, larunbatean kuadrillen eguna eta pilotariena izan zen. Batez ere, Julen Urruzolarena, profesionaletan San Joan egunean debutatu ostean, herrian bertan jokatzen zuen lehen partidan herritarren omenaldi polit bat jaso baitzuen.
Atzo arte ibili ziren festan asteasuarrak. Erretirodunen eguna izan zen, eta meza eta hamaiketakoaren ondoren, herri kirol erakustaldia ikusteko aukera izan zuten. Joxe Ramon Izeta eta Joseba Ostolaza harri-jasotzaileak eta Ugaitz Mugertza eta Joseba Otaegi aizkolariak aritu ziren plazan. Ondoren, euren bazkaria ere izan zuten, frontoian. Arratsaldean, Asteasuko trikiti eta pandero eskolako emanaldia izan zuten. Ondoren, sorginaren igoerarekin eman zieten amaiera aurtengo festei.
Urkizun ostiralean mus txapelketa izan ondoren. Larunbatean haurrak izan ziren protagonista nagusi, jolasak eta bazkaria izan baitzituzten. Igandean, patata tortilla eta sagardo lehiaketa, toka eta bolo txapelketa ere izan zituzten.
Leaburun ere giro ederrean igaro dituzte festak. Larunbateko sega jaialdia eta herri afaria izan dira ekitaldirik jendetsuenak. Sega apustua Jose Luis Zelaia belauntzarrak irabazi zuen; lau segundogatik gailendu zitzaion Jon Otegi Arbola herritarrari. Igandeko dantzarien emanaldian, txakolin dastaketan eta herri kirol erakustaldian ere jende asko bildu zen, eta horrela agurtu zituzten festak.
Larraitzen ez dituzte jaiak ospatzen, baina bai San Pedro eguna bera. Meza nagusiaren ondoren, trikiti eta pandero doinuek alaitu zuten auzoa.