Zuretzat zer da parekoa?
Igor: Gauzak oso argi dituen neska bat. Bizitzan zer nahi duen eta zer gustatzen zaion badaki. Oso tematia eta langilea da.
June: Hasteko, aita. Bizitzako arlo askotan laguntzen dit helburuak eta ametsak betetzen. Oso langilea da.
Nola definituko zenuke?
Igor: Oso langilea eta nekaezina da.
June: Beti besteei laguntzeko prest egoten den pertsona da. Oso langilea da.
Zer ezaugarri positibo
nabarmenduko zenuke parekoaz?
Igor: Oso neska alaia da, nahiz eta batzuetan, denok bezala, bere haserreak izan. Pasioz bizi du gehien gustatzen zaion hori.
June: Gustuko dituen lanetan gogotik egiten du lan, dena aurrera ateratzeko. Bizitakoa besteei erakusteko gaitasuna dauka.
Eta ez hain positiboa?
Igor: Ez da erraza erantzuten! Ez daukat ia ezer txarrik esateko. Purrustadak botatzen ditu tarteka, eta hori ere beharrezkoa da batzuetan. Jenio bizia ere badu.
June: Nik ere antzekoa esango dut! Haserrealdi batzuk ere izaten ditu noizean behin.
Nora joango zinateke gustura parekoarekin?
Igor: Edonora! Familian plan asko egiten ditugu. Zaletasun bera dugu ia denetan; beraz, edozein lekutara joango nintzateke berarekin.
June: Nik ere bai, baina zerbait aukeratzekotan, eskiatzera joango nintzateke berarekin.
Berarekin pasatako une bereziren bat?
Igor: Lehenbizikoz lasterketa batera eskiatzera joan ginenekoa. Candanchun (Aragoi, Espainia) geunden, eta elurte ederra bota zuen. Biak bakarrik geunden lasterketa bezperan. Oso une polita izan zen niretzat.
June: Antzeko zerbait esan behar nuen. Lehiatzen hasi nintzenean, biak bakarrik joaten ginen asteburuetan; ama eta Iker etxean geratzen ziren. Une bikainak pasatu ditugu!
