Tolosako Udalak joan den astean argitaratu zuen, Leidor aretoa kudeatzeko lehiaketa publikoaren bueltan sortutako auziari erantzuteko oharra. Bada, hari erantzunez, EH Bilduko oposizioak bere iritzia plazaratu du ohar bidez, adierazpen nagusi baten pean: «Udal gobernuaren balorazioa ez zaigu batere zuzena iruditu, ezta oharra udalaren izenean argitaratzea ere, gu kontuan hartu gabe».
Batetik, Kontratuen Inguruko Errekurtsoen Administrazio Organoaren ebazpena «gutxiesteko ahalegina» ikusi dute gobernuaren jarreran, «Molaturen errekurtsoko lau puntutatik hiru onartu dituenean».
Era berean, EH Bilduren ustez, pleguetan «gehiegizko eskakizunak» egiteak kanpoan utz ditzake «zerbitzua kalitatez eskain dezaketen enpresak».
Lehiaketa publikoetan errekurtsoak ohikotzat hartzea ere «harrigarria» iruditu zaio oposizioari eta, horregatik guztiagatik, «autokritika» eta «argibideak» exijitu dizkio gobernuari, halakorik berriro gerta ez dadin.