«Aurtengo helburua iazko postua hobetzea da»

Laskorain areto futbol taldearen entrenatzailea da Aitor Garcia. Azken jardunaldian, derbia jokatu zuten Tolosala Hirukideren aurka eta denboraldiko bosgarren garaipena lortu zuten.

Liga hasiera sendoa egin duzue.
Lehen lau partidak irabazi genituen. Atseden jardunaldi baten ondoren, Bilboren aurka berdinketa. Lau partida jokatu ditugu euren aurka, guztiak berdinduz. Bagenekin zaila izango zela, eta ontzat eman genuen puntua. Ondoren, Elorriora joan ginen, eta han iritsi zen lehen porrota. Kantxa zail batean.

Bigarren zaudete sailkapenean.
Eta postu hori mantentzea espero dugu, eta ahal bada, gora begiratu. Urte hau bukatzeko hiru partida geratzen dira, eta espero dugu, asteburuz asteburu garaipenak lortzen joatea.

Taldearekin gustura?
Bai. Iaz lesioekin eta lan kontuekin ez ginen ongi ibili. Aurten, oraingoz, konpromiso handia erakusten ari dira jokalariak, eta entrenamenduen kalitatean nabari da; hori oso garrantzitsua da.

Lehena bakarrik igotzen da gora.
Lehen bost sailkatuak lau puntutan gaude. Oso estu dago kontua. Azken lau-bost jardunalditan goran egotea garrantzitsua izango da. Orduan ikusiko da zeintzuk duten aukera. Iaz hirugarren amaitu genuen liga, eta aurten postu hori hobetzea izango da helburua.

Entzun elkarrizketa osoa audioan

Albiste hau ATARIKIDEei esker argitaratu dezakegu. Haiei esker Tolosaldeko albisteak libre, euskaraz eta kalitatez irakurtzen dituzu. Horrela izaten jarraitzeko eman babesa Tolosaldeko Atariari eta ZU ERE IZAN ZAITEZ ATARIKIDE.

BATAK BESTEA DAKAR


EGIN ATARIKIDE!