Tolosako Udalak ezarriko duen hondakin bilketa sistema "oraindik ondo aztertzeko" dutela dioen arren, PSE-EEko zinegotzia Jose ignacio Asensio ez da ados azaldu Udal Gobernuak hartutako erabakiarekin: "Ez dakit zergatik aukeratu duten edukiontzi mota hori. Gure ustez bosgarren edukiontzia da onena".
Bide horretan, udalak hautatutako bilketa komunitario eta derrigorrezkoak "esperimentua dirudi" Asensioren arabera: "Sistema hau ez dago beste inon. Zein da bosgarren edukiontziarekin duen desberdintasuna? Gainera, ez dakigu organikoa eta errefusa noiz atera beharko diren ere".
Halaber, datu falta salatu du: "Informe tekniko eta ekonomikorik ez daukagu eta hori ere beharko genuke aukeratutako sistema baloratzeko".
Finean, "iprobisazioa" ikusten du Asensiok, udalaren erabakian, : "Inprobisazioa izan da eta ez dira ausartu nahi zuten erabakia hartzera, hauteskundeak gertu baitaude".
Azkenik, atez ateko bilketa sistemari bidea zabalik utzi diotela salatu du: "Abendurako ezarritako tasetara iristen ez badira, atez atekoa ezarriko dute".
