Zuretzat zer da parekoa?
Mattin: Anaia izateaz harago, bizi oso bat partekatu dudan pertsona bat. Bizipen eta une asko ditugu elkarrekin. Askok bikiak garela pentsatzen dute, nahiz eta lau urteko aldea dugun.
Aritz: Anaia, eta, nire kasuan, erreferente bat ere bai. Lau urte zaharragoa izanda, haren pausoak jarraitu izan ditut. Bera kopiatzen saiatu naiz askotan.
Nola definituko zenuke?
Mattin: Ausardia handiko pertsona gisa. Une zailetan aurrera egiten du beti. Baliabide handiko pertsona da.
Aritz: Burutsua, batez ere. Berak ere une zailetan aurrera egiteko gaitasun handia dauka. Erreferente bat da niretzat.
Zer ezaugarri positibo nabarmenduko zenuke parekoaz?
Mattin: Haren gaztetasuna. Horrek ausardia berezia ematen dio.
Aritz: Une erabakigarrietan erabakiak hartzeko duen indarra. Gauzei aurre egiteko adore handia dauka.
Eta ez hain positiboa?
Mattin: Egoskor samarra dela! Berearekin atera nahi izaten du gehienetan.
Aritz: Bere patxada.
Nora joango zinateke gustura bestearekin?
Mattin: Beti antzeko lekuetara joaten gara, normalean mendira, bai oinetakoak hartuta, bai bizikletarekin. Pirinioetan izan gara, baita Teiden ere (Kanariar Irlak, Espainia)... Suitza aldera ere joango nintzateke gustura berarekin.
Aritz: Edonora! Hondartzara ere gustura joango nintzateke berarekin.
Berarekin pasatutako une bereziren bat?
Mattin: Asko ditugu! Bat aukeratzekotan, Teidera egindako bidaia aukeratuko nuke.
Aritz: Nik ere Teidekoa aukeratuko nuke, baina ez dut ahaztu nahi azken udan egindako Carros de Foc (Herrialde Katalanak) ibilaldia. Oso esperientzia polita izan zen.
