Abenduaren 9tik 15era ospatuko da Errenteriako Giza Eskubideen Zinema Dokumentalaren Jaialdiaren hirugarren edizioa. Aurten, gainera, Errenteriako Udalak hamargarrenez antolatutako Giza Eskubideen Jardunaldiekin bat egingo du jaialdiak. Guztira hamalau filmek osatzen dute programazioa: bost luze eta bederatzi labur. Proiekzio hauek astelehenetik, hilaren 9tik, ostiralera, 13ra izango dira, Niessen Zinemetan, 19:00etan, doako sarrerarekin. Etxebizitzarako eskubidea, feminismoa, LGTBI kolektiboa, indarkeria politikoa, migrazioa eta ekologismoa dira aurtengo edizioan proiektatuko diren filmen gaiak. Saioetarako gonbidapenak Lekuona Fabrikan edo sarrerak.errenteria.eus webgunean eskura daitezke. Informazio osoa eta eguneratuta www.ggeefilm.com webgunean dago eskuragarri.
Bestalde, Donostia Kulturak eta Euskadiko Filmategiak antolatuta, eta Tabakaleraren eta Institut Valencià de Cultura – Filmoteca de la Generalitat Valencianaren lankidetzarekin, Donostiako Tabakalera egoitzako Nosferatuko pantaila western garaikidearen agertoki zabaletara egiten ari da bidea 2024an. 1962 aukeratu dute abiapuntutzat aurtengo ziklorako, orduan hasten baita western klasikoaren trantsizioa generoak hartuko dituen bide berrietara. Urtean zehar genero honetako hainbat film ikusteko aukera izan da bertan, eta gaurtik aurrera, beste hiru ikusi ahal izango dira.