Aski eta asko izatearen magia

«Zuentzat ez da aski izango / baina neretzat asko da» esanez agurtu zituen, Aitor Mendiluzek, BECeko 13.500 lagunak. Aski zena asko izatera heltzeko bertsoaldi paregabeak osatu zituen Iruran bizi den andoaindarrak, eta txapelketako aurreko saioetako zapore gazi-gozo hura ondo gozatu zuen.
1.155 punturekin laugarren postua eskuratu, eta gogoan duen finalik «onenetakoa» bizi izan zuen oholtzatik. Berea izan zen, gainera, eguneko bertsoaldirik baloratuena, puntukako ariketan: 165 izan ziren jaso zituen puntuak.
Puntuak puntu, Euskal Herriko bertsozaleak ere beren arantzak ateratzea joan ziren Barakaldora, antza, Mendiluzeren bidetik. Bokadilo, hamaiketako eta sagardo botilen gainetik, txalo zaparradarik beroenak jaso zituzten gai sozial eta aldarrikapenek.
Egungo errealitatearen inguruko bat-batekoak entzun eta saritzeko gune izateaz gain, ordea, bertsozaletasunetik haragoko zerbait bilakatu zen BEC. Aspaldi ikusi gabeko ezagunen, duela zazpi urte ikaskide izandako lagunen edo udalekuetan elkar ezagututako jendearen topagunea izan zen igandean Bizkaia Arena, eta guztiak txapelaren itzalak elkartu zituen.
Txapelara heltzeko bide horretan, bertsolariek altxarazi zuten publikoa, eta publikoaren beroak sutan jarri, haien mihiko polbora. Nahikoa, pozik izateko aski diren gauza txiki horiek, 13.500 bertsozaleren oroimenean asko izatera pasatzeko.

Leidorren goi-mailako saioa
Urtarrilaren 18an izango da, larunbatarekin, eta Leidor aretoan. Goi-mailako bertso saioa antolatuko du Tolosaldeko Ataria komunikazio taldeak, 18:00etatik aurrera.
Amaia Agirreren gaiek gidatuta, Amets Arzallus, Maialen Lujanbio, Igor Elortza, Jexuxmari Irazu, Jon Maia eta Andoni Egaña bertsolariak ariko dira kantuan, eta sarreren salmentaren berri datozen asteotan izango da.