Asteasuko Goine gaztandegiak beste bi sari jaso ditu berriki: Otzara gaztak urrezko domina lortu du Lyongo (Frantzia) munduko produktu onenen lehiaketan; eta Urre Handia (Gran Oro) izendapena, berriz, Frankfurteko nazioarteko dastatze lehiaketan.
Ez dira Otzara gaztak jasotzen dituen lehen sariak. Azaroan zilarrezko domina lortu zuen La Seu d'Urgellen (Herrialde Katalanak) ospatu zen Pirinioetako artisau-gaztaren lehiaketan; eta sari nagusia ere jaso zuen Esneki azokaren lehen edizioan. Horrez gain, joan den urtean ere saritu zuten Goine Frankfurteko lehiaketan: zilarrezko domina jaso zuen Yrula gazta trufadunak.
Goine gaztandegiko Joseba Otegi ekoizleak aipatu izan du sari horiek jasotzea «oso baliagarria» dela produktuak ezagutarazteko. Bada, Lyongo txapelketako antolatzaileen arabera, bataz beste %13 igotzen da haien lehiaketan urrezko domina jaso duten produktuen salmenta.
