Alegiatik, Tolosatik, Asteasutik, Anoetatik, Ikaztegietatik, Abaltzisketatik... eta, nola ez, Amezketatik. Eskualdeko txoko askotako zaleak joan dira gaurkoan Bilbora, Jokin Altuna animatzeko asmoz.
Jokin Altunaren senideak –attona Joxe ere bai–, kuadrillakoak, herritarrak, Iñaki Amundarain alkatea; eskualdeko pilotari ugari –Jaka, Urruzola, Urretabizkaia, Peña...–, Anjel Mari Peñagarikano bertsolaria, Julen Telleria telebista aurkezlea, Juantxo Arakama Glaukomako abeslaria... aurpegi ezagun ugari izan dira Bizkaia pilotalekuan.
Goizetik festa giroa izan da nagusi, trikitixa doinuekin eta amezketarraren aldeko oihuekin.
Partidan zehar asko sufritu dute zaleek, baina merezi izan du. Txapela Amezketara doa. Eta txapela horrek amezketar guztien buruak estali ditzake. Baina lastima txapela bana ezin etxera eramatea. Guztiek merezi dute eta.