10:00etan zuten lehen hitzordua amezketarrek. Kamiseta urdinak soinean zituzten amezketarrez betetako autobusa minutu gutxira abiatu da Bilbo aldera, Beartzana jatetxean Zalditeriako Zazpigarrenaren doinuak jartzearekin batera. Bagoaz! Txapelakin itzuli! zioten herrian geratzen zirenek.
Bidean ginela, Joseba Bereziartua 'Latu'-k zuzenean hitz egin du Euskadi Irratiko Amarauna saioan, baita Aimar Olaizolaren beste zale goizuetar batek ere. Horrekin batera piztu dira Amezketako zaleak, eta orduantxe entzun ahal izan dira eguneko lehen ohiuak. Jokin! Jokin! Jokin!
Behin Bilbora iritsita, Plaza Berrira abiatu dira amezketarrak, eta Zazpikale ingurura gero. Garazi eta Jokin Tolosa trikitilari eta pandero joleek girotu dute goiza, eta izan da dantza egitera ausartu denik ere. Bilbotarren batzuk ere Jokinen aldeko oihuak bota dituzte.
Gaur Bilbo urdina da, datorren urtean gorri izateko nahia nagusi bada ere. #AupaAltuna!