Larunbata, urriaren 24a, Liburutegien Nazioarteko Eguna da eta horri lotuta, hainbat ekitaldi antolatu dituzte Tabakalera, Koldo Mitxelena Kulturunea eta Donostia Kulturak, elkarlanean. Urriaren 21, 22 eta 25ean liburutegi publikoetan COVID-19aren eragina aztertuko da hitzaldi, mahai inguru, liburu aurkezpen eta film baten proiekzioekin.
Gaur, Donostia, Eibar eta Oñatiko liburutegietako arduradunekin batera arituko da Plazida Otaño liburutegiko Arantxa Zabala. Ataria irratiko Letren Errepublika saioan azaldu bezala, goizez, Galizia, Bartzelona eta Madrilgo liburutegietako arduradunek hartu dute parte eta arratsaldean arituko dira Gipuzkoako liburutegietako profesionalak. Esperientziak eta ezagutzak partekatuko dituzte COVID-19k sortutako egoeraren aurrean. Nola aldatu du pandemiak liburutegietako lana? Nola birmoldatu behar izan dira herritarrei eskaintzen zaizkien zerbitzuak? Guzti horri buruz hitz egingo dute.