Zizurkilgo Kaxilda gaztetxea hustu du Ertzaintzak gaur goizean. Aiztondoko Gazte Asanbladak sare sozialen bidez jakinarazi du 09:30ean bota dutela behera gaztetxeko atea. Eraikinaren legezko jabeak sartu dira gero eta gaztetxea husteari ekin diote. Ertzainek 12:30 inguruan alde egin dute.
Iazko apirilaren 19an okupatu zuten 17 urtez hutsik egondako pabiloia. Uda aurretik eraikinaren jabeekin eta Zizurkilgo udal ordezkariekin hiruko mahai bat osatu zuten gazteek, egoerari irtenbide negoziatu bat emateko. Saiakerak huts egin zuen eta abenduaren 3an gaztetxeko bi kide deitu zituzten epaiketara. Handik hamar egunera jakinarazi zuten epaia: Kaxilda gaztetxearen berehalako hustea agindu zuen epaileak eta 1.100 euro inguruko isuna ezarri zien bi auzipetuei.
Epailearen ebazpena gaur egikaritu dute poliziek. Aiztondoko Gazte Asanblada jakitun zen edozein unetan hustu zezaketela gaztetxea eta horregatik bertatik aterata zeuzkaten baliozko ondasunak. Gaur goizean asanbladako zenbait kideek beste hainbat gauza ateratzeko aukera izan dute.
Aiztondoko Gazte Asanbladak TOLOSALDEKO ATARIAri jakinarazi diotenez, bihar agerraldia egingo dute Zizurkilgo Joxe Arregi plazan gertatutakoaren inguruko irakurketa egiteko. 17:00etan egin dute hitzordua.
Atzo Hondarribiko gaztetxea hustu zuen Ertzaintzak eta Tolosako Ezpala gaztetxea ere desalojo arriskuan dago.
