Tolosaldeko zein Goierriko herriak, eguneroko uneak eta pertsonak iruditan jaso zituzten Ricardo eta German Intxaustik 1913tik 2003ra, eta ondare hori guztia Gipuzkoako Artxibo Orokorrari eman zion dohaintzan Rikardo Intxausti ondorengoak. Intxaustitarren argazki ondareko zenbait irudi identifikatzeko, ordea, ez dute behar adina informazio, eta hori lortzea izango da Lanean irekita ekimenaren helburua. Ostiralean egingo dute proiektuko lehen saioa, 09:30ean, Amezketako kultur etxean, eta parte hartuko dute, besteak beste, Amezketako Udalak, herritar talde batek eta funtsaren emaileak —Rikardo Intxaustik—.
Gipuzkoako Foru Aldundiko Ondare Historiko-Artistikoa, Bildumak eta Museoen Zerbitzutik nabarmendu dute «balio historiko eta dokumental handiko» funtsa dela: «200.000 argazki-negatibo inguruk osatzen dute, Intxaustitarren estudio eta laborategiko materialaz eta beren liburutegi espezializatuaz gain. Irudi askok identifikatzeko behar adinako informaziorik ez dutenez, Lanean irekita proiektua jarri dugu abian».
