Lizartzatik igaro ondoren, Leaburu-Txarama, Tolosa, Ibarra, Anoeta, Irura, Amasa-Villabona, Zizurkil eta Aduna gurutzatu ditu. Tolosan eta Amasa-Villabonan, adibidez, sekulako giroa izan dute, eta parte hartzaileek txarangen eta txistularien laguntza izan dute zenbait unetan. Eskualdeko milaka euskaltzalek egin dute bat euskararen aldeko ekimen erraldoiarekin, eta zortedun batzuek martxoaren 29an Bilbora helduko den lekukoa eraman dute eskuan, hunkituta eta pozez zoratzen.
Egun horretan irakurriko dute mezua Bizkaiko hiriburuan, baina aurrez, bigarren aldiz igaroko da eskualdetik, bezperan, hain justu. Hilaren 28an, Ikaztegietatik sartuko da Korrika Tolosaldean, 13:09 aldera, eta Alegiatik pasatu ondoren, Tolosara helduko da. Sartu-irten txikia egingo du Olarrain auzoan, Azpeitirako bidea hartu aurretik. Bitarte horretan, Albizturtik eta Bidania-Goiaztik igaroko da Korrika.
