Eskualdean garraio publikoan egiten diren joan-etorriei erreparatuz gero, Tolosaldeko herritarren lanegunetako joan-etorri gehienak eskualdean bertan egiten dituztela ikusi daiteke; joan-etorrien %35 dira. Ondoren, Donostiara joaten dira gehien –joan-etorrien %30–. Autoan egiten diren joan-etorri gehienak, aldiz, Donostialdera izaten dira –%53–. Tolosaldean bertan mugitzerakoan joan-etorrien %5 besterik ez da egiten autoan, Eusko Jaurlaritzak 2021ean egindako mugikortasunari buruzko inkestaren arabera.
Gipuzkoako Foru Aldundiak Lurraldebus autobus zerbitzuaren inguruko datuak eman zituen pasa den otsailean. Esan zuenez, Gipuzkoako hiriarteko autobus zerbitzuarentzat pasa den urtea «inoizko urterik onena» izan da. Izan ere, 2023an baino 2,3 milioi bidaia gehiago egin dira eta hain justu, 2023. urtean «erregistro guztiak hautsi» ziren. 2024an hortaz, 28,8 milioi bidaiari izan zituen Lurraldebusek, 2023an baino % 8,71 gehiago. Hazkundea eskualde guztietan eman dela esan zuen foru aldundiak. Goierrin aritzen den Bilman Bus izan da gehien hazi dena –2023arekin alderatuz % 15,45 igo da–, ondoren Buruntzaldean eman da igoerarik handiena (% 12,52), eta hirugarrena izan da Tolosaldea – %8,46–.
