Gipuzkoako Foru Aldundiak Lurraldebus autobus zerbitzuaren inguruko datuak eman ditu. Esan duenez, Gipuzkoako hiriarteko autobus zerbitzuarentzat pasa den urtea «inoizko urterik onena» izan da. Izan ere, 2023an baino 2,3 milioi bidaia gehiago egin dira eta hain justu, 2023. urtean «erregistro guztiak hautsi» ziren. 2024an hortaz, 28,8 milioi bidaiari izan zituen Lurraldebusek, 2023an baino % 8,71 gehiago.
Hazkundea eskualde guztietan eman dela esan du foru aldundiak. Goierrin aritzen den Bilman Bus izan da gehien hazi dena –2023arekin alderatuz % 15,45 igo da–, ondoren Buruntzaldean eman da igoerarik handiena (% 12,52), eta hirugarrena izan da Tolosaldea – %8,46–. Bidaia kopuruari dagokionez, Oarsoaldean eta Bidasoan aritzen den Ekialdebus izan da bidaia gehien izan dituena, eta atzetik du TBH (Tolosa Buruntzaldea Hiriartekoa), hain zuzen, Buruntzaldean eta Tolosan zerbitzua ematen duena, 6,6 milioi bidaiarekin. Tolosaldean 376.300 bidaia zenbatu dituzte.
Gehitu dutenez, BU13 lineak, Buruntzaldea-Tolosak, milioi bat bidaiatik gora egin ditu, eta BU07k –Tolosa-Donostia– 880.378 bidaia. T002 lineak –Tolosa, Ibarra, Berrobi-Elduain-Berastegi– 84.000 bidaia egin ditu.
Azahara Dominguez Mugikortasunerako, Turismoko eta Lurralde Antolaketako diputatuak esan du datuek erakusten dutela «garraio publikoaren erabilera sustatzeko neurriek, milaka errefortzuek eta zerbitzu bereziek, eta zerbitzuak herritarren benetako beharretara egokitzeak, zerbitzua gero eta erakargarriagoa» egin dutela. «Departamentutik garraio publikoa sustatzeko politikak bultzatzen jarraituko dugu, Lurraldebusi bere historiako aurrekonturik handiena emanez 2025ean, gure zerbitzua gipuzkoarren benetako beharretara egokitu dadin, herritar guztientzat eskuragarri egon dadin eta inor bazterbidean utz ez dezagun. Garraio publikoa beste eskubide batzuetarako sarbidea bermatzen duen eskubidea da, hala nola, hezkuntza, osasuna, lana edo aisialdia, eta horren erabilera bultzatzen jarraituko dugu gure politikekin, edozein pertsonak, bere errenta-maila eta bizilekua edozein izanda ere, bere bizitza garatzeko aukera berdintasuna izan dezan».