Eskualdeko txirrindulariek orain dela zenbait hilabete hasi ziren pedalei eragiten, denboraldiari begira ahalik eta prestakuntza hoberena egiteko, eta bete-betean hasteko. Batzuek korritu dituzte jada sasoiko lehen lasterketak, eta beste batzuek oraindik pixka bat gehiago itxaron beharko dute denboraldiari ekiteko. TOLOSALDEKO ATARIA-k eskualdeko txirrindulariek sasoi honetarako dituzten helburuak eta asmoak bildu ditu ondorengo orrietan.
Gorka Sorarrain da tropeleko helduena, eta iaz amateur mailan lehiatu ostean, aurten BAI-Sicasal Portugalgo taldeak fitxatu du, maila profesionalean lehiatzeko. Sorarrain da bakarra Euskal Herriko talde batean ez dagoena. Izan ere, aipatuko diren gainerako txirrindulari guztiak, hemengo talde batean daude.
Leaburuko Eneko Arrospide duela bi denboraldi hasi zen lehiatzen amateur mailan. Aurten gora egin du eta Cafes Baque taldeak fitxatu du.
Maila gorenean dago Unai Iribar Euskaltel Euskadiko txirrindularia, eta bigarren denboraldia egingo du bertan. Errepidea eta pista uztartuko dituena izango da Eukene Larrarte. Bizkaia-Durangoko txirrindulariak, Iribarrek bezala, bigarren sasoia egingo du taldean.
Geratzen diren gainerako txirrindulariak Laboral Kutxa taldekoak dira: Naia Amondarain, Iñaki Murua, Iñaki Diaz eta Unai Zubeldia. Amondarain eta Diaz estreinakoz ariko dira taldearekin, lehenak Sopelan hiru denboraldi egin ostean, eta bigarrenak bi Caja Ruralen. Murua da eskualdetik Laboral Kutxan eskarmentu handiena duena, bosgarren sasoia egingo baitu. Zubeldiak, berriz, bigarrena du.
