Abenduaren 3an, Euskararen Nazioarteko Egunean, besteren artean, Berrobin eta Lizartzan bertso- eta trikiti-poteoa antolatu zuten; bi bertsolari eta musikariak elkartu, eta herriko tabernetan zehar giroa alaituz igaro zuten ostiral iluntzea.
Bi bertso-saioetako bertsoaldiak nahasian josiz osatu dugu irratsaioa. Berrobin, Sebastian Lizaso eta Asier Azpiroz jardun ziren kantuan, eta Ostolaza trikitilaria lagun; Lizartzan, berriz, Haritz Mujika eta Oihana Iguaran aritu ziren bertsotan, eta Hurbil eta Gaien bikotearen erritmoetara moldatu behar izan zuten.
Bi herrietan giro aparta izan zuten, eta askotan erraza ez bada ere, bertan bizitakoa ondo jaso daiteke irratsaiorako aukeratutako bertsoaldietan. Irratsaio amaierako kantua: “Katamalo” (Hitzak: Maialen Lujanbio; musika: Katamalo).