Dolu egunak Berastegin eta Berrobin

Berastegiko udaletxean herriko bandera masta erdian dago.

Asteburu tristea izan da eskualdean. Ezbehar ugari izan dira mendian eta horietako hirutan heriotzak izan dira. Berastegiko gazte bat hil zen Huescako Pirinioetan eta Berrobiko beste mendizale bat hil zen atzo, Balerdi mendian. Hori dela eta, hiru eguneko dolua egitea erabaki zuten atzo, bi herrietan.

Atzo Berrobiko 39 urteko mendizale bat hil zen Balerdi mendian eta larunbatean Berastegiko 26 urteko gazte bat Huescako Aspe mendian.  Hori dela eta, Berastegiko eta Berrobiko udalek hiru eguneko dolu eguna egitea erabaki zuten atzo. Berrobiko alkateak, David del Miguelek, doluminak eman dizkie mendizalearen senitarteko eta gertukoei.

Berastegin ere samina sortu du heriotzak eta udalak babesa eta elkartasuna adierazi die sendiari eta gertaera izan zenean bere ondoan zeuden herritarrei eta gertukoei. Era berean, behar dutenerako euren ondoan dagoela adierazi du eta hiru dolu egun egitea erabaki zuen atzo. Antolatutako ekintza guztiak atzeratu ditu ere eta herriko bandera masta erdian jarri du, lazo beltz batekin.

Zizurkilen 57 urteko txirrindulari bat hil zen larunbatean baso-pista batean. Udalak doluminak eman dizkie hildakoaren senitarteko eta lagunei.

Albiste hau ATARIKIDEei esker argitaratu dezakegu. Haiei esker Tolosaldeko albisteak libre, euskaraz eta kalitatez irakurtzen dituzu. Horrela izaten jarraitzeko eman babesa Tolosaldeko Atariari eta ZU ERE IZAN ZAITEZ ATARIKIDE.

#EgitenDuzunaGara


EGIN ATARIKIDE!