Berastegi, Elduain, Berrobi eta Ibarrako alkateek bilera izan dute gaur goizean Gipuzkoako Foru Aldundiko Bide Azpiegituretarako departamenduan. Komunikabideetan irakurri ahal izan zutelako jakin zuten diputazioak A-15 autobidea itxiko duela Euskalmetek elurra 700 metrotik behera iragartzen duenean. Eta horrek eragingo dituen ondorioek kezka sortzen diete. "Pisu handiko kamioiei ez diete utziko Berastegitik behera joaten, Sakanako errepidetik bideratuko dituzte, hori esan digute gaurko bileran, baina guk badakigu zer gertatzen den autobidea ixten dutenean, kamioirik egon gabe ere. Errepide horretatik doazen ibilgailuen kopurua igotzearekin dena kolapsatzen da", esan du Amaia Azkue Berastegiko alkateak. Autobidea itxi duten guztietan ibilgailu kopuru handia jaisten da GI-2130 errepidetik eta arazoak sortzen ditu Berastegi, Elduain, Berrobi eta Ibarran. "Jende askok ez du errepidea ezagutzen eta horri gehitzen badiogu elurra egongo dela... egoera ez da batere erraza izango. Iragarpena astean zehar izan daiteke gainera eta zerbitzu asko eskaintzeko arazoak izango dira; lantokietara edota ikastetxeetara doazen autobusak, bestelako zerbitzuak eskaintzen dituztenak...".
Alkateek eskatu dute ibilgailuak A-15etik ez jaistea, baina ez dela posible esan diete. "Bermatu digute zerbitzu eta baliabide guztiak bermatuko dituztela, Ertzaintza egongo dela guztia bideratzeko, suhiltzaileek ere badakitela... koordinazio on bat egongo dela esan digute. Horrekin batera esan digute elurra egiten badu errepidea garbi egongo dela eta aurretik adarrak moztuko dituztela, elurra egiten duenerako dena prest izateko".
Malgutasuna eta errealitatera egokitzea da alkateen iritziz beharrezkoa, horregatik uste dute elur iragarpenarekin bakarrik ixtea gehiegizkoa dela. "Askotan tokatu daiteke autobidea ixtea, azarotik maiatzera bitarte egon gintezke horrela", esan du Azkuek.