Zein asmorekin bertaratu zara azokara?
Motibazio handirik gabe etorri naiz, azalpen gehiegi entzungo nuelakoan edo. Inoiz ez nintzen horrelako ekimen batean egon, eta beraz, zerbait berria izan da niretzat. Hala ere, esperientzia ona izan da, nahiko aberatsa, eta batez ere, bertako giroak erakarri nau gehien. Ondorioz, esan dezaket, apur bat konbentzituta noala etxera.
Eta zer da bertan topatu duzuna?
Egia esan, uste nuena baino interesgarriagoa izan da. Egon naizen postuetako batek nire arreta bereganatu duela esan dezaket, Inmakulada Lanbide Heziketako Ikastetxearenak, hain zuzen. 8 eta 14 urte bitarteko atzerritarrei begirako proiektu baten inguruan aritu zaizkit. Emandako azalpenak eta lan egiteko duten modua oso interesgarriak iruditu zaizkit.
Egunen batean boluntario modura ikusten duzu zure burua?
Ez dakit. Oraingoz ez nuke baiezkorik emango, baina hemendik urte batzuetara, uste dut moldatu naitekeela modu horretara lan egiteko. Herritarrei edozein laguntza mota emateko prest egongo nintzateke, batez ere, haurrei; horiekin egoteko eta lan egiteko abilezia dudala esango nuke.