Gaur Larraulgo udal liburutegia bisitatu dugu. Nora Urbizu liburuzainaren ahotik martxan dituzten ekimenen berri jakin dugu. Besteak beste, "txoko morea" deitu diotena zabaldu dute. Ez da hainbeste espazio fisikoa, parekidetasun eta genero aniztasunarekin lotura duten liburuak izendatzeko modua baino. Gometxa more batekin identifikatuta aurkituko ditu irakurleak, heldu nahiz gazte, genero ezberdinetako liburuak.
Julen Belamuno idazlearekin hitz egin ondoren, Galtzaundiren irakurle taldeaz hitz egin dugu Yurre Ugarte dinamizatzailearekin. Aurre aurreko saioak berreskuratu dituzte ikasturte hastearekin batera, eta gaur arratsaldean, Amets Arzallusek eta Ibrahima Baldek elkarrekin idatzitako Minan liburuaz nola arituko diren aurreratu digu.
Saioa amaitzeko, Zizurkildik Maiderrek Uxue Alberdiren Dendaostekoak liburua gomendatu digu.