Parte-hartze datuak

1,26 puntu egin du behera parte hartzeak eguerdirako

Estefania Beltran de Heredia Eusko Jaurlaritzako Segurtasun Sailburuak 12:00ak arte zenbatutako datuen berri eman du 13:00etan egin duen agerraldian. Ordurako, herritarren %14,4k eman du botoa; 2016ko hauteskundeetan %15,4koa izan zen parte-hartzea.

Izurri baten erdian egiten ari dira gaur Eusko Legebiltzarrerako hauteskundeak Araban, Bizkaian eta Gipuzkoan. 75 eserlekuak (probintzia bakoitzean 25) beteko dituzten kideak aukeratu behar dira; horretarako, baina, ohi baino abstentzioa handiagoa espero da. 1.790.243 herritar daude botoa ematera deituta, segurtasun neurri zorrotzen artean.

EAEko parte-hartze datuekin batera, lurralde bakoitzeko ehunekoen berri ere eman du Beltran de Herediak. Gipuzkoan, %2,05 egin du behera (2020an, %15,48; 2016an, %17,53). Bizkaian, berriz, %1,02 jaitsi da (2020an, %13,49; 2016an, %14,51). Azkenik, Araban, herritarren %0,41 gutxiagok bozkatu du (2020an, %13,51; 2016an, %13,92). Sailburuak behin eta berriz azpimarratu du datu hauek 12:00ak arte zenbatutakoak direla.

Jada eman dute botoa lehendakarigai guztiek. Alderdi guztiek azpimarratu dute segurtasun neurriak bermatuta daudela, eta beraz, botoa ematera joateko dei egin die herritarrei.

18:00etan egingo du hurrengo agerraldia sailburuak, eta orduan emango du datu gehiagoren berri.

Galizian, gora

Galizian ere hauteskundeak egiten ari dira. Eguerdirako, %19,32koa izan da parte-hartzea bertan. 2016ko hauteskundeekin alderatuta, %4,21 igo da; duela lau urte, ordu bererako, botoa eman zezaketen herritarren %15,11k bozkatu zuten.

Erlazionatuak

Ohiko tokietan ere bai

Tolosaldea

Normaltasun osoz ari dira bozkatzen herritarrak, eskualdeko udalerrietan. Herri txikiagoetan, segurtasun eta higiene neurriak bete behar badira ere...

Albiste hau ATARIKIDEei esker argitaratu dezakegu. Haiei esker Tolosaldeko albisteak libre, euskaraz eta kalitatez irakurtzen dituzu. Horrela izaten jarraitzeko eman babesa Tolosaldeko Atariari eta ZU ERE IZAN ZAITEZ ATARIKIDE.

#EgitenDuzunaGara


EGIN ATARIKIDE!