Eusko Legebiltzarrerako hauteskundeak uztailaren 12rako deitu ditu Iñigo Urkulluk. "Nire erantzukizuna betez, txosten teknikoak aztertuta, alderdi politikoak entzun eta Gobernu Kontseiluan gogoeta egin ondoren, Eusko Legebiltzarrerako hauteskundeak deitzea erabaki dut, uztailaren 12rako", azaldu du.
Hiru arrazoi hartu omen ditu kontuan deialdia egiterakoan:
- "Osasun arrazoiak: Osasun Publikoaren azken txostenak bi errealitate baieztatzen ditu: azken asteetan kasu positiboen etengabeko gainbehera; eta heriotzen jaitsiera nabarmena".
- "Arrazoi juridiko eta legezkoak; funtsezko eskubide bat betetze ahalbidetzea. Euskal alderdi politikoekin izandako bileran bat gentozen “hauteskundeak egitea garrantzitsua dela“. Abiapuntu hori oinarri hartuta, legez, bi aukera baino ez ditugu: Hauteskundeak uztailean egitea edo udazkenera arte atzeratzea. Nire erabakia uztailerako deitzea izan da; horrela beti izango dugu bigarren aukera bat".
- "Parte hartzearen bermearen arrazoia: Segurtasun Sailak “Segurtasun eta Babes Plana” prestatu du. Plan horrek neurriak ezartzen ditu herritar guztiek botoa emateko behar diren bermeak ezartzeko".
Iñigo Urkulluren esanetan "erabakirik arduratsuena da, bigarren aukera zabalik uzten duelako. Horrela, gaixotasunak atzera egiten badu, udazkeneko aukera ere izango dugu".
