Hauteskundeetarako deialdiak Urkulluren interes alderdikoiei erantzuten diela uste du EH Bilduk

EH Bilduren ustez, EAJren hautagaiak data hori aukeratu izana ez dago inongo osasun arrazoitan oinarrituta; "helburu bakarra bere interes elektoral eta alderdikoiak babestea da".

Iñigo Urkulluk uztailaren 12rako deitu ditu Esko Legebiltzarrerako hauteskundeak. EH Bildu kritiko agertu da iragarpen horrekin, bai eta Lehendakariak esandakoekin ere. Tartean, Urkulluk, alderdiekin hitz egin izana aipatu du. Honela erantzun die EH Bildutik: "Oposizioak joan den ostegunean egindako bileran beste aukera batzuk proposatu bazizkion ere, bereari eustea erabaki du Urkulluk. Lehendakaritzako bileran zeuden alderdi politikoak entzun zituen, baina ez zituen aditu. Erabakia aldez aurretik hartua zuelako. Astelehenean bizitakoa antzezpen hutsa besterik ez zen izan. Beraz, Urkulluren ardura da uztailaren 12rako hauteskundeak deitzea, ez beste inorena".

Hauteskunde egunaz gain, kanpainaz ere hitz egin dute EH Bildutik:"Hauteskundeak berme osoz egiteko konpondu beharko diren osasun gaiez gain, hauteskundeak eta hauteskunde kanpaina berme demokratikoekin garatzeko izango diren zailtasunak azpimarratu nahi ditu EH Bilduk. Ezker subiranistaren ustez, zailtasun handiak egongo dira hauteskunde-kanpainan aukera-berdintasuna bermatzeko, eta zailtasunak izango dira herritarrek beren botoaren zentzua hausnartzeko".

Albiste hau ATARIKIDEei esker argitaratu dezakegu. Haiei esker Tolosaldeko albisteak libre, euskaraz eta kalitatez irakurtzen dituzu. Horrela izaten jarraitzeko eman babesa Tolosaldeko Atariari eta ZU ERE IZAN ZAITEZ ATARIKIDE.

#EgitenDuzunaGara


EGIN ATARIKIDE!