Hezkuntza Sailaren ikastetxeetarako itzulera planaren ezaugarri nagusia "inprobisazioa, prezipitazioa eta zehazgabetasuna" dira sindikatuentzat. ELA, LAB, Steilas, CCOO eta UGT ez daude ados Kristina Uriarte sailburuaren erabakiekin, ez lehen eta ez orain. Horren aurrean, bihar, mobilizatzea erabaki dute, Bilbon.
Ikastetxeen itxiera eta ondorena, gaur arte
- EAJ eta PSE-EEk osatzen duten Eusko Jaurlaritzak, martxoaren 12an eta 13an itxi zituzten ikastetxe guztiak. Hasiera batean, gutxienez 15 egunetarako.
- Martxoaren 14an, Espainiako Gobernuak "alarma egoera" deklaratu zuen konfinamendua ezarriz. Azken honen amaiera, faseka, apirilaren 28an iragarri zuten PSOEk eta Podemosek.
- Maiatzaren 7an, Eusko Jaurlaritzako Hezkuntza sailburu Cristina Uriartek, ikasleak ikasgeletara bueltatzen hasiko zirela iragarri zuen, maiatzaren 18tik aurrera.
- Gaur, maiatzak 12, Tolosaldeko hainbat ikastetxek ez zuten Hezkuntza Sailaren itzulera planaren jakinarazpen ofizialik, Ataria-k eguerdian jakin duenez.
- Aldi berean, baina eguerdia baino lehen, "Hezkuntza Saileko iturrietatik edanaz", albistea ondorengoa zen: "Jaurlaritzak dio eskolek «autonomia» izango dutela itzuleraz erabakitzeko". Hau da, "ikastetxeak irekitzearen ardura eskolen gain utzi duela Eusko Jaurlaritzak".
- Arratsaldean, duela ordu gutxi, sindikatuek idatzi bateratu bat atera dute, Hezkuntza Sailaren bi erabaki horiek kritikatuz, hau da, maiatzaren 18an itzulera plana martxan jartzearena eta irekitzearen ardura eskolen gain uztearena.
Sindikatuen idatzia osorik:
Hezkuntza Sailak ikasketa presentzialetara itzulera ikastetxe bakoitzaren ardurapean uzteko erabakia are arduragabeagoa litzatekeela salatzen dute sindikatuek
Hezkuntza Sailburuak pasa den Ostegunean hezkuntzako hainbat eragileri aurkeztutako plana, hezkuntza eragileekin negoziatu eta landu gabeko plana izan da. Plan horretan jaso beharko lirateken irizpide zein neurriak aplikatu, aurrera eraman, bete eta betearazi beharko dutenen parte hartzerik gabe Hezkuntza Sailak hartutako aldebakarreko erabaki baten aurrean gaude beraz.
Behin plana ezagututa gainera, sindikatuon deialdiari jarraituz gaur burutu dugun bileran hezkuntza eragileok ondorio komun batera iritsi gara, gaur gaurkoz langile zein ikasleen osasuna bermatuz datorren maiatzaren 18tik aurrera itzulera abian jartzeko baldintzarik ez dagoela. Are gehiago, familien zein ikasleen iritzia, langileen ordezkariena bezalaxe, ez dela inolako momentuan kontuan hartu eta osasunaren ardura ere haingan jarri dutela.
Plana, motz geratzen diren segurtasun irizpide orokorregiak jasotzera mugatzen da. Hezkuntza Sailak irizpide orokor horiek betetzeko hartuko diren neurriak ikastetxeekin landu gabe hartu ditu, baita neurri horiek abian jartzeko baliabideak aurreikusi gabe ere, zentruetako zuzendaritzengan neurrigabeko ardura maila ezarriz. Itzulera planaren ezaugarri nagusia inprobisazioa, prezipitazioa eta zehazgabetasuna direla esan dezakegu beraz.
Egoera honetan erabateko arduragabekeria litzateke datorrean maiatzaren 18an planteatutako itzulera abian jartzea, langile zein ikasleen osasuna, eta ondorioz gizarte osoarena, arrisku larrian jarriko litzatekeelako.
Planak Hezkuntza Komunitate osoaren gaitzespena eta kritika jaso ditu ezagutzera eman zenetik. Komunikabideen bidez jakin dugunez, eta eragindako presioaren eraginez, badirudi Hezkuntza Sailak bere erabakia aldatu dezakeela. Hezkuntza Sailak Batxilergoan, Lanbide Heziketan eta DBH4n ikasketa presentzialetara itzultzea edo ez, zein datetan eta zein baldintzetan, ikastetxe bakoitzaren esku uztea planteatuko luke. Erabaki hau are arduragebekia handiagotzat jotzen dugu eragileok sindikatuok. Alde batetik, osasuna bermatu gabe jarraitzen duen bitartean, Hezkuntza sailak ardura guztia ikastetxeen, familien eta ikasleen bizkar gainean jartzen duelako, bere arduraz beste larriki kale eginez. Hezkuntza Sailari dagokio osasuna bermatzeko irizpide zehatzak, protokoloak, neurriak eta hauek aurrera eramateko baliabideak plan egoki batean jaso eta aurreikustea, ondoren ikastetxe bakoitzak bere autonomiaren baitan aurrera eraman ahal ditzan. Bestetik, erabakia ikastetxe bakoitzaren esku utzita, ikastetxe ezberdinetako ikasleen arteko arrakalak sortu edo areagotzeko arrisku argia duelako, batzuk ikasketa presentzialak jasoko lituzketelako eta besteek ez esaterako. Dagoeneko egoera honek ikasleen arteko hezkuntza prozesuetan eragin duena.
Idatzi hau sinatzen dugun sindikatuok, hezkuntza sailari galdegiten diogu bere ardurak bere gain hartzeko, hezkuntza eragile bakoitzarekin, dagokion esparruan, itzulera neurriak negoziatu ditzala eta osasuna bermatzeko neurriak ahalbideratu ditzala.