Enirio-Aralar

"Artzaintzak eta abeltzaintzak naturarekiko orekan egon behar dute"

Landarlan eta Eguzki talde ekologistek elkarretaratzea egin dute Tolosako epaitegiaren aurrean eta eskatu dute Enirio-Doniturrieta pistaren ebaluazioa egitean Eusko Jaurlaritzak eta Aranzadi Zientzia Elkarteak egindako txostenak aintzat hartzea.

Landarlan eta Eguzki talde ekologistek elkarretaratzea egin dute gaur, Tolosako epaitegiaren aurrean. Izan ere, gaur deklaratu dute bertan  Gipuzkoako Foru Aldundiko Jose Ignacio Asensio Ingurumen diputatuak, Monica Pedreira Ingurumen zuzendariak eta Arantxa Ariztimuño Mendietako eta Natura inguruneko zuzendariak. Gaur da deklarazioak hartzeko azken eguna eta epaiketa ez da hasi, Enirio-Doniturrieta pistaren auzia instrukzioan baitago.

Talde ekologistek epaileari eskatu diote kontuan hartzeko Enirio-Doniturrieta pistaren ebaluazioa egin zenean Eusko Jaurlaritzako Natur Inguruneko zuzendaritzak eta Aranzadi Zientzia Elkarteak egindako txostenak. "Beste txosten batzuk ere egon ziren, baina horiek ez dute maila tekniko bera, aipatutako biak oso maila altua dute. Gure ustez  Ingurumen sailak pistak egiteko baimena eman zuenean ez zituzten txosten horiek aintzat hartu", esan du Edurne Huesa Landarlan eta Eguzkiko kideak.

Huesak salatu du era berean, Gipuzkoako Foru Aldundiak komunikabideetan egindako adierazpenetan bi talde ekologistak ezker abertzalearekin lotu dituela. "Esan nahi dugu ez dugula inongo alderdi politikoren babesik. Hemen gaude herritarron babesa dugulako, era guztietako babesa, baita ekonomikoa ere epaitegiaren aurrean egon ahal izateko. Iruditzen zaigu errespetu falta bat dela, ez guri bakarrik, baizik eta herritarrei ere. Gure ustez erakundeek kontuan hartu behar dute Gipuzkoan eta Gipuzkoatik kanpo jendea kezkatuta dagoela Aralarren egiten ari diren pistekin".

Aralar Natur Parkea defendatzen dutela eta horretan jarraituko dutela ere esan du Huesak eta euren ustez Aralarren artzaintza eta abeltzaintza egon behar duela: "Hori uste dugu guk ere, baina egon behar du naturarekiko orekan eta hori da gaur egun ziurtatzen ez dena. Lanean jarraituko dugu, ingurumen elkarteen helburua ingurumena zaintzea eta defendatzea baita, eta tamalez ez  dugu ikusten Foru Aldundiak eta Enirio-Aralar Mankomunitateak orain arte, hori egin dutenik. Guk Aralar Natur Parkea defendatuko dugu".

Epaitegia

Gaur deklaratu dute Gipuzkoako Foru Aldundiko Jose Ignacio Asensio Ingurumen diputatuak, Monica Pedreira Ingurumen zuzendariak eta Arantxa Ariztimuño Mendietako eta Natura inguruneko zuzendariak Tolosako epaitegian, Eguzki eta Landarlanek salaketa bat medio. Talde ekologistek jarri zuten salaketa Ingurugiroaren eta Lurralde Antolaketaren aurkako ustezko delitu batengatik Enirio-Igaratza arteko bidea egokitzeko lanak egin izanagatik, eta 16 pertsona pasa dira epaitegitik azken asteetan deklaratzera, tartean Abaltzisketako Jon Zubizarreta eta Amezketako Ainhoa Zuriarrain, eta Enirio-Aralar Mankomunitateko idazkaria, lau teknikari eta Foru Aldundiko hainbat politikari ere.

Erlazionatuak

«Haserre» Enirio-Doniturrieta pistaren auzian deklaratzen hasi direnak

«Haserre eta lotsatuta gaude», adierazi du Jon Zubizarreta Abaltzisketako alkateak. Enirio Aralarko Mankomunitateak Aralarko Natur Park...
Enirio-Doniturrieta pistak eragindako «txikizioa» salatu du Aralar Bizirik plataformak

Erabiltzailearen aurpegia Tolosaldea

Plataformak salatu du lanengatik auzipetutako udal ordezkariek bazekitela obra «ilegala» zela.
Enirio-Aralar Mankomunitateko hainbat udal ordezkari ohik babesgabetasun egoeran daudela salatu dute

Aurreko legealdian Mankomunitateko udal ordezkari izan ziren zazpi pertsonak, tartean Abaltzisketako Jon Zubizarretak eta Amezketako Ainhoa Zuriarr...

Albiste hau ATARIKIDEei esker argitaratu dezakegu. Haiei esker Tolosaldeko albisteak libre, euskaraz eta kalitatez irakurtzen dituzu. Horrela izaten jarraitzeko eman babesa Tolosaldeko Atariari eta ZU ERE IZAN ZAITEZ ATARIKIDE.

#EgitenDuzunaGara


EGIN ATARIKIDE!