«Ekairena bezalako berri gogor eta gordinak jaso behar izaten ditugu tamalez egunerokoan guregandik gertu ditugun errealitate anitz horietaz ohartzeko eta jabetzeko», esan du Aiztondoko Gutun Lehiaketako irabazleak.
Gehitu duenez, duela lau hilabete Ekaik bere buruaz beste egin zuenean barruak «ikaragarri» mugitu zizkion: «Oso gogorra iruditu zitzaidan, hurbiletik jarraitu dut suizidio horren atzean zer zegoen; onarpen handia zuen Ekaik esparru desberdinetan, baina, berak borroka egiten zuen osasungintza prozesuak azkartu zitezen, eta badirudi borroka horretan azkenean nekatu egin zela».
Ekairen gurasoek sare sozial eta bestelako euskarrietan idatzi eta sentitu izan dutena gertutik jarraitu duela adierazi du beasaindarrak. «Saiatu naiz bere etxean sartzen, bere egunerokoa irudikatzen eta berari kontatzen Ondarrun eta bere etxean gertatzen diren eta gerta litezkeen kontuak, modurik ahalik eta xamurrenean».
Bestalde, Ekaitz Goikoetxeak abian duen Transformatzen proiektuaz ere hitz egin digu: «Transexualitatea ertz ezberdinetatik jorratzen saiatu gara». Herrietan eta ikastetxeetan landu dute ikasturte honetan, eta hurrengoan ere jarraitzeko asmoa azaldu du.
