Iker Vicente otsagabiarrak baiezkoa eman dio Xabier Orbegozo Arria V.ak botatako erronkari. Beraz, apustua jokatuko dute Tolosako zezen plazan hiru hilabete barru, apirilaren 8an.
Pasa den ostiralean lotu zuten apustua, Tolosako Kantabriko tabernan. 12 kanaerdiko eta 60 ontzako beste 8 ebakitzeko baldintza adostu zuten; hogei enbor, guztira. Hogei kanaerdikotara jokatzea zen Arriaren hasierako asmoa eta proposamena, eta Vicentek, berriz, kanaerdikoak eta oinbikoak nahastea nahi zuen; azkenean, 60 ontzako enborrak sartzeari ameto eman zioten bi aldeek. 6.000na euro izango dituzte jokoan.
Ikusmin handia sortu du Arriaren eta Vicenteren arteko apustuak. Errezilen jaio eta Ibarran bizi den Arria V.a apustuetan zaildutakoa da; joan den abenduaren 3an jokatu zuen azkena eta irabazi egin zion Zalduari, Azpeitian. Nafarrak, aldiz, lehen apustua izango du apirilaren 8koa. Hala ere, goi-mailako aizkolaria da Vicente; besteak beste, egungo Euskal Herriko txapeldunordez da.