Duela egun batzuk atxilotu zituen Israelgo armadak Global Sumud Flotillako ekintzaileak —tartean, tolosar bat—. Atxiloketen ostean torturak salatu dituzte ontzidiko kideek, eta Turkiatik Euskal Herrira larunbatean iritsi ziren sei euskal herritarrak. Loiuko aireportura iristean, ordea, oldartu egin zitzaien Ertzaintza, eta bi ekintzaile eta harrera egitera joandako beste bi kide atxilotu dituzte. Gertatutakoa salatzeko eta atxilotuei elkartasuna adierazteko manifestazioa egin zuten atzo, Palestinarekin Elkartasuna plataformak deituta, Tolosan.
Bingen Zupiria
Bingen Zupiria Eusko Jaurlaritzako Segurtasun sailburuak han izandako «kargak eta bizitako egoerak» deitoratu zituen atzo; esan zuen hori ez dela «gatazkak konpontzeko modua», eta irudiek kezka eragiten diotela. Dena den, «probokazio hutsa» izan ziren jokabideak ere kritikatu zituen. «Sentitzen dut atzo gertatutakoa, gainera, bi bider. Gertakariak, kargak eta bizitako egoerak deitoratzen ditut, bereziki, adostuta zegoelako egoera hori nola kudeatu behar zen».