«Emozioa, harrotasuna eta poza» sentitu dituzte Aitor eta Amaia Olazabal Egino neba-arreba tolosarrek 24. Korrikaren 1135. kilometroan gure lekukoa eraman dutenean. Hain justu, euskararen aldeko ekimen erraldoia Tolosan sartu den unean izan da, Amarotz auzoaren sarreran. Familia izan dute bidelagun: bien bikotekideak eta gurasoak. Lehenik, gurasoek hartu dute lekukoa; ondoren, Amaiari eta haren bikotekideari eman diete; eta azkenik, Aitorrek eta haren bikotekideak eraman dute.
«Euskararen aldeko mugimendu polita da Korrika, beti esaten diet ikasleei eta ingurukoei euskara altxor bat dela, zaindu behar dela, eta gure nortasuna dela. Horrenbeste jende ikustea ideia berdinaren inguruan korrikan eta borrokan, oso polita da», esan du Olazabalek.
