Hiru tolosarrek Txaranga aplikazioa sortu dute Tolosako inauterietan txarangen eta konpartsen kokapena denbora errealean jarraitzeko. Aplikazioa dagoeneko eskuragarri dago Android gailuetarako eta, bestela, txaranga.eus web orrialdean ere kontsultatu daiteke Tolosako mapa denbora errealean.
Txaranga edo konpartsa bakoitza emititzen hasten denean Tolosako mapan borobil batekin seinalatuta azalduko da, eta erabiltzaileek denbora errealean jarraitu ahal izango dute non dagoen igorle bakoitza.
Estreinaldia, larunbatean
Probak egin eta aplikazioa prest badute ere, bihar goizean erabiliko dute lehen aldiz erraldoien eta buruhandien konpartsak eta Aiz-Orratz elkarteko txarangak. Biak ala biak Rondilla kaleko elkartetik 12:00etan abiatu eta Leidor antzokira joango dira kalejiran. Bada, emisioak iraun bitartean aplikazioak denbora errealean erakutsiko du kokapen zehatza.