Letoniako Youth Choir Kamer abesbatzak eraman zuen garaipena, atzo, Tolosako Leidor aretoan ospatu zen 35. Abesbatza Kantuaren Europar Sari Nagusian. Guztira, herrialde ezberdinetako bost abesbatza aritu ziren lehian, herritar askoren ikusmiran, baina letoniarren ahotsek aretoan bildu ziren ikus-entzuleen eta epaimahaikideen arreta irabazi zuten.
2022ko ekainetik abesbatzaren zuzendari artistikoa eta nagusia den Jurgis Cabulisen gidaritzapean abestu zituzten piezak. Guztira, bost izan ziren aukeratutako kantuak; Adolfs Skulte zuzendariaren Jurai (1971); H. Purcell eta Sven-David Sandstrom zuzendariek, Hear My Prayer, O Lord; Richard Dering zuzendariaren Factum Est Silentium (1618); Erik Esenvalds zuzendariaren A Drop In The Ocean (2006); eta Tadeja Vulc zuzendariaren Sine Sole Nihil Sum (2019).
Abesbatza Kantuaren Europako Sari Nagusia lau aldiz –2004, 2003, 2019 eta 2025– irabazi duen munduko lehen abesbatza da Youth Choir Kamer. Iaz, gainera, Bulgariako Barnan ere irabazle izan ziren.
Horiekin batera Choir Sola talde letoniarrak ere parta hartu zuen lehiaketan. Horrez gainera, Filipinetako Imusicapella eta Los Cantantes de Manila eta Indonesiako The Resonanz Children`s Choir ere aritu ziren. Indonesiako abesbatza zen, hain justu, Tolosako lehiaketa ordezkatuz parte hartu zuena.
Datorren hitzordua, ostegunean
Ostegunean, berriz, 56. Tolosako Abesbatza Lehiaketa abiatuko da. Ekitaldia 19:00tan hasiko da, eta igandera arte izango dira saioak. Emanaldietarako sarrerak Kutxabanken bitartez eskuratu ahalko dira.
