EHEk esan duenez, segurtasun agentea euskaldunon aurkako mezuak oihukatzen hasi zen eta elkarteko kidea lurrera bota eta atxiki zuen denbora batez.«Horrelako erasoak onartezinak dira, EHEtik gogor salatzen ditugu», esan dute.
Tolosako alkate Andu Martinez de Rituertok esan du kezkaz jaso duela albistea. Udaletik gertatutakoaren inguruko azalpenak eskatu dituzte eta euskaldunon kontrako gisa honetako erasoak erabat arbuiagarriak direla gaineratu du, «baita jarrera fisiko horiek ere».
Galtzaundi Euskara Taldetik ere irmoki salatu dute herritarrak euskaraz egiteagatik jasotako erasoa eta emandako tratua. Gehitu dute euskararen aurkako erasoak ez direla onargarriak. «Tolosan ere euskaraz bizi gara», gaineratu dute.
Goizaldean agertu da salaketa lehen aldiz sare sozialetan gertatutakoaren berri emanez. Lekukotasun horren arabera, «niri ez zaidazula euskaraz hitz egin» eta «Hau Espainia da» erran dio segurtasun agenteak gazteari.
