1982 urtean, Jose Ignazio Ansorena Miner Mirrik zortziko eta biribilketa bat barnebiltzen zituen ‘Xaxu konfiterua’ obra sortu zuen, Joxe Mari Gorrotxategi gozogilea zenak hala eskatuta.
Tolosako Plaza Zaharrean, Gorrotxategi zegoen leku berean, aurrez Xaxu ezizenez ezaguna zen gozogileak –San Blas auzoko Sasoeta baserrian jaioa, hortik ezizena– zuen bere lantokia, eta hura omendu nahian egin zion enkargua Gorrotxategik Ansorenari. Harreman handia zuten biek. Gorrotxategi Donostiako udal txistularien emanaldiak ikustera sarritan gerturatzen zen. Ordutik, txistularien artean asko zabaldu da doinu hau, eta ohiko errepertorioan sarritan erabili izan da, bereziki, Tolosako Udal Txistulari Bandaren kasuan.
Gaur, bost urte betetzen dira Joxe Mari Gorrotxategi hil zela, eta urteurrena aitzakiatzat hartuta, doinu horien moldaketa berria egin dute Jose Ignazio Ansorenak eta Joxemari Oiartzabalek, eta txistulari bandaz gain, musika banda ere gehitu dute partiturara.
Moldaketa hau Tolosan estreinatuko da, San Joan egunean eguerdian Tolosako bi bandek –Udal Musika Bandak eta Udal Txistulari Bandak– Iruñeko Udal Txistulari Bandarekin batera Berdura Plazan eskaini ohi duten kontzertuan. Emanaldia 13:00etan izango da.