Hodeiertz abesbatzak aitortza beroa jaso du bere 40. urteurrenean eskainitako kontzertu berezian. San Frantzisko eliza ikuslez bete zen larunbateko saio hunkigarrian. Abesbatzak laguntzaile ugari izan zituen kontzertuan zehar, tartean, koruko kide ohiak, eta besteak beste, Tolosako Udalaren omenaldia jaso zuen.
Hodeiertz abesbatza eragile garrantzitsua izan da Tolosako kultur mailan. «Ekarpen handia egin dio gure herriari eta nazioartean ere ibili da 40 urte oparo hauetan», nabarmendu zuen Andu Martinez de Rituerto alkateak. Nazioarteko Abesbatza Lehiaketaren bilakaeraren ere talde «oso garrantzitsua» izan dela gaineratu zuen alkateak, oroitzapenez betetako hitzorduan.
54. Tolosako Abesbatza Lehiaketaren baitan antolatutako hiru kontzertu berezietatik lehena izan da Hodeiertz abesbatzarena. Izan ere, lehiaketaz gain, emanaldi bereziak ere izango dira zaleen gozamenerako. Gaur, Leidorren, 19:30ean hasita, German Ormazabal pianistaren eta Maite Arruabarrena mezzosopranoaren kontzertua izango da, eta jaialdiari itxiera emateko, Suhar abesbatzak kontzertua egingo du igandean.
Argazkiak: Juan Urretabizkaia.
