Tolosa & Co merkatarien elkarteak antolatuta Braderie azoka izan da egun osoan Tolosako kaleetan. Parte hartu duten saltokiek euren produktuak kalera atera dituzte ohi baino prezio baxuagoetan, eta herritarrek aukera baliatu dute erosketak egiteko.
Eguraldiak ere asko lagundu du horretarako, eta giroa alaitzen erraldoi eta buruhandien konpartsa, txarangak nahiz txu-txu trena ere izan dira. Bada, dendariak gustura agertu dira ekimenak izan duena erantzunarekin. Kimetz arropa dendako Kattalin Zubizarretak azaldu duenez, bazegon zalantza pixka bat pandemiagatik herritarrek nola erantzungo ote zuten, baina, eguna "primerakoa" izan dela esan du; "salmentak ondo joan dira eta eguraldiak ere asko lagundu du, beraz, ezin gara kexatu".
Niko arropa dendako Leider Uzkudunek goizean ibili dela batik bat jendea erosketak egiten esan du, eta agian beste urteetako braderiak baino apalagoa izan dela, baina, hala ere pozik daude izandako erantzunarekin. Colors arropa dendako Amaia eta Elia ere gustura azaldu dira: "Eguraldi ona eginez gero jendea asko mugitzen dela ikusi da. Gainera, orain jendea osasun egoeragatik pixka bat lasaiago dabil eta gustura ibili da. Mugimendu handia egon da, eta giro polita izan dugu".
