GAL ikertzen lagunduko duen plataforma independente bat sortu nahi duten herritarrei luzatu die deia Zabalak eta horretarako bideak argitu ditu, Facebooken, Twitterren edota gal.ikerketa@gmail.com posta elektronikoan. Antolatzerakoan interesa agertu dutenei erantzungo dietela azpimarratu du mezuan GALek eraildako Joxi Zabalaren arrebak.
Amaitzear den legealdian, Pili Zabala Elkarrekin Podemoseko legebiltzarkide izan da. Egunotan, Espainiako Kongresuan Felipe Gonzalezen eta GALen arteko harremana ikertzeko ikerketa batzorde bat osatzeari Unidas Podemosek ezezkoa eman ondoren "etsipena" adierazi du tolosarrak. Dena den, azken orduetan jarrera aldatu du Unidas Podemosek eta ikerketa batzorde bat sortzeko eskaria babestuko duela iragarri du, EH Bildu, EAJ, ERC, Junts Per Catalunya, CUP eta BNGrekin batera.