Egiari Zor fundazioak ohar baten bitartez eman du ezagutzera izapideak abiatu dituela ETAko militante izandakoaren familiak. "Eskaera honen helburua da aitortzea Txabi Etxebarrietak giza eskubideen urraketa jasan zuela, eta biktima gisa aitortua izan dadila, betiere Balorazio Batzordea osatzen duten adituek hala irizten badiote".
Motibazio politikoko indarkeriaren testuinguruan giza eskubideen urraketak jasan dituzten biktimei errekonozimendua eta erreparazioa ematen die Eusko Legebiltzarraren uztailaren 28ko 12/2016 Legeak. Familiak tramiteei ekin die orain "1968an jasan zuen giza eskubideen urraketa aitortua izan dadin". Gainera, Eusko Jaurlaritzaren Memoriaren udal erretratuak txostenean jadanik “nahikoa argitu gabeko kasu” moduan dago jasota Etxebarrietarena.
Familiak aktiboki parte hartzen du Egiari Zor fundazioaren dinamikan, estatuen indarkeria jasan duten biktimen eskubideen defentsan lan eginez. Fundazioaren bidez jakinarazi du, halaber, orain arte ezezaguna zen dokumentazio ofiziala eskuratu ahal izan duela, "kasua argitzen lagundu dezakeena".
Duela bi urte 1968-2018 Begirada bat askatasunera dinamika abiatu zuen Etxebarrieta Memoria Elkarteak, eta besteak beste, Tolosan ekitaldia antolatu zuen 2018ko ekainaren 2an.