Tolosaldea euskararen arnasgune bilakatze bidean, Galtzaundi Euskara Taldeak hilabeteak daramatza maiatzaren 27ari begira: Arnastu euskara lipdub erraldoia antolatu dute ordurako, eta kantua eta ibilbidea prest dituzte jada.
Tolosako Plaza Zaharrean egin dute aurkezpena, hantxe biribilduko baitute lipdub jendetsua. Kantu baten erritmoa eta letra jarraituz, izena eman duten herritar eta talde guztiek ibilbideko kaleak zeharkatzea izango da gakoa, amaieran guztiak Plaza Zaharrean elkartzeko. Horrela, beraz, Arnastu euskarak ezinbesteko zuen elementua ondu dute dagoeneko: kantua.
Zigor Sagarna tolosarrak sortu du melodia, eta Laket taldeak jantzi du musikaz; perkusioan Xabier Beldarrainen laguntza izan dute. Grabaketa, berriz, Ereñozuko (Hernani, Gipuzkoa) Aieka estudioan egin dute, Pello Gorrotxategiren zuzendaritzapean.
Kantuak doinu latinoak dakartza gogora eta, hain zuzen, horixe izan da Oihana Iguaran bertsolariaren sormen iturria. Arnastearen ideia erdigunean jarri, eta hortik loratutako ideiekin osatu ditu errepikak eta letra, aldarrikatuz Tolosaldea euskara biziberritzeko plaza izango dela.
500 METRO ETA GOGO BAKARRA
Maiatzaren 27an, 12:30ean ekingo diote Arnastu euskara lipdub-a grabatzeari, Letxuga kalean hasita. Honako ibilbidea jarraituko du gero: Errementari kalea, Leitza kalea, Berdura plazako arkupeak, Kale Nagusia, Agintari kalea eta Plaza Zaharra.
Ia kilometro erdia egingo dute eskualdeko herritar eta taldeek, eta oraindik ere zabalik da parte hartzeko izen ematea. www.arnastueuskara.eus ataritik egin daiteke.
ARNASTU EUSKARA
Korronte txiki baten eraz
hasiak fin zurrunbiloan goaz hegaz
elkarrekin haize-errota berriz xarmaz
bete dadin euskaraz har ezazu arnas
ta putz egin
Aharrausian hasia hauspoz
ta kalera arnasestuan bide askoz
ta aurrera
hasperen eta zotin saltoz
biharrera
gaur irrintzi bat da ta zatoz
ospatzera
Lau haizetara
zabal dezagun arnas gunea
gu haize gara
hizkuntza baten hauspo xumea indar ufada
hitzarekiko begirunea
ta euskara da
gure tokia ta unea
Hots hutsa ez da hitza
hitza ez da hots hutsa
hitzetatik hizkuntza
hizkuntzatik ahotsa BIS ahotsez eman hatsa
hatsa hauspotuz bultza herria zen gorputza hizkuntza da bihotza
Lau haizetara... BIS
(Hitzak: Oihana Iguaran)
