Inguruan jolasean zebiltzan bi umek aurkitu dute gorpua, zuhaixka batzuen artean. Ertzaintzak baieztatu du hilotza Ildefonso Alustizarena dela. Segurtasun Sailak Tolosaldeko Ataria-ri jakinarazi dionez, hasiera batean, gorpuak ez du indarkeria zantzurik, dena den, autopsia egingo diote.
Apirilaren 3an desagertu zen Alustiza, Tolosako komentuko 84 urteko frantziskotarra. Egun horretan, Loiolan bazkaltzen izan zen, familian. Azpeitian bertan bizi zen arreba bati bisita egitera zihoala esanda jatetxetik irten zenean galdu zuten haren arrastoa.
Hurrengo egunean bertan hasi zituzten bilaketa lanak eta apirilaren 5ean topatu zuten bere autoa, Azpeitiko Urola kalean. Joan den astelehenean, eta astebete emaitzarik lortu gabe aritu ostean, bilaketa lanak bertan behera utzi zituzten larrialdi zerbitzuek.
